رح أحكيلكم قصة بابا ويلي صار معو و شكرا كتير لكل حدا وقف معنا بدعاء و كلام حلو والله يخليلكن أهاليكم يا رب.نحنا عيلة بسيطة وبابا أكبر داعم بحياتنا نحنا ٤ بنات و صبي صغير بس فجأة تغير كلشي بحياتنا.أنا بدي إشكر كل شخص وقف معنا و سندنا بكلمة وكان متأكد انو يلي صار معنا تبلّي لإنو الكل بيعرف إنو بابا (سندويش جهاد) بطعمينا من نفس اللقمة يلي بطعميكن ياها. القصة بلّشت لما بالصيفية تسكّر المحل بالشمع الأحمر لأن فوق ال ٢٥ شخص صار معهم تسمم و طلع الحق علينا و المضحك إنوّ إدارة مستشفى من دون ذكر الإسم، نزلت بالتقرير كل أسامي الأشخاص يلي إجت ع المشفى بنفس اليوم على إنها حالة تسمم من مطعم جهاد ل ترفع دعوى جماعية بالمخفر لدرجة صادمة إنّو أشخاص نازلة أساميهم بالدعوى و مع أنهم ما أكلوا من المطعم .عند المراجعة مع إدارة المشفى طلعوا كل حدا بيجي ل عندهم و معه حالة تسمم بسبب الطقس على لسان شهود عيان بينزلوا على اللائحة بسرعة و هيك انتشر الخبر و بنفس الوقت قلبت معه حياتنا. وكمان في شي مهم بدي قولو إنّو الكل بيعرف سبب تسكير المحل كل هالمدّة ظلماً و هيدا الشي لإنو نحنا بلبنان و فهمكن بزيادة بس حبّينا القانون ياخد وقتو لإنو كنا واثقين و متأكدين إنّو العيّنات رح تكون سليمة ١٠٠٪.وهيدا يلي صار والحمدلله طلعت النتيجة وكانت مطابقة للمعايير و يلّي صار معنا كان ظلم كبير و سلّمنا هيدا الشي لرب العالمين هو بيتكفّل بالأشخاص يلي أذونا بالكلمات الجارحة و التهم الباطلة لقطع الأرزاق و تشويه سمعة مصدر رزق بس الحمدلله بقيت التعليقات يلي شكرت بسمعة المحل طاغية بكل البوستات على مواقع التواصل و كل شي صار بحكمة ربنا .و هلق طبعاً بعد ما عزّلنا المحل و غيّرنا كل شي، حابّي كتير تجو تشاركونا فرحتنا بكرة الإفتتاحية على الساعة ٣ مع كل محبّينا وتدعمونا ونحنا قلبنا كبير بساع الكل و هيدا أكيد بفضل رب العالمين إنّو راجعين أقوى و بدّي دعائكم للتوفيق والسلام عليكم ورحمة الله وبركاتهممتنّة يا الله أن هذا الأب، هو أبي و قلبي و ضِلعي و موطني. إبنتك ماريا
